Wednesday, April 05, 2006

الليل و قضبان......و عيناك


الليل و قضبان و عيناك و رغم البعد اهواك...ده كان اول بيت شعر اقراه في حياتي و هو اللي خلاني افهم يعني ايه شعر... الشعر ده كاتبه شاعر اسمه عبد الرحمن غازي كان بابا_الله يرحمه_ جايب المجموعه الكامله بتاعته وهو جي من السعوديه..قريت فيه كتير بس اكتر بيت علق معايا هو البيت ده و بيت تاني بيقول (ظلام الليل مقبره حوت جثه احلامي)...يا نهار اسود ايه الاقتضاب العبقري لمعاناه طويله عريضه بتحصل كل يوم بليل..وهو انك تيجي اخر اليل لتكتشف انك ولا حاجه ولا وصلت لحاجه من اللي نفسك فيها و تعذب في نفسكو تؤنبها...
ومن ساعتها و انا بدأت اقرا شعر..مش كتير..و مش لكل الشعراء...بس كنت فهمت خلاص وانا في السن ده_اولى اعدادي_يعني ايه شعر...ده كلام كويس وابن ناس والله و بيقول حاجات جميله و كبيره بس للاسف انا مكنتش فاهماها...ماما بأه كانت بتشتغل في مركز شباب و كانت ماسكه اداره الشباب و كان في ولد اسمه حسام دايما يدخل مسابقات شعر..وهو اصلا ممثل مسرح و كاتب و كولكشن فنان كده يعني..كان دايما حسام يقعد معايا يحاول_المسكين _يفهمني عشان هو حس اني بكتب كويس...وده كان وانا في 3 اعدادي..
مازلت حسا اني فاشله في الشعر...دايما بابا كان يقولي اللي بتكتبيه ده مش شعر ده كلام منمق...بس الحاجه الواحده من الشعر اللي كتبته و بعزها لانها الوحيده اللي لما قراها عجبته و قالي (اهو هو ده الشعر)
كان اسمها ديوان....و بعديها مش بكتير مات.....و انا مكتبتش شعر الا بعدها بسنه و معرفش ليه اتجهت فجأه للشعر العامي يمكن عشان قرأت كتير لفؤاد نجم و صلاح جاهين و مؤخرا خالد كساب...بس برده هيفضل دايما اهم شاعر في حياتي هو ابويا...لانه كان شاعر عبقري...........
و عمري ما هنسى بيت الشعر بتاع حداد اللي كان كاتبه لبوه برده و اللي لما قريته قعدت اسبوع مكتئبه..
(ابويا جاني في المنام و سمعت تنهيده...قلب عليا اللي راح بقديمه و جديده)...
الشعر عالم خرافي اسطوري ملوش اول ولا اخر و لا حدود و لا مقاييس...

1 comment:

Darweshe said...

كل عمل بيدعه الانسان وينتجة أى انسان وأى عمل
يبقى أسمة فن والشعر من الفن
أهم حاجة أنه فن ...وانتى فنانة ؟؟