Friday, August 18, 2006

انا عايزه عربيه و لاب توب و سندوتش هامبورجر

و الله يا جماعه الواحد من حقه برضه يبقى مرفه زي الناس المرفهين

لا... و الله م هو حقد طبقى و لا حاجه

ده تطلع مش اكتر...

يعني الواحد مثلا ميلاقيش نفسه اذ فجاة و على غفله من الزمان معاه بتاع 600 مليون جنيه

و لا بلاش طمع خليهم 10 مليون

يالهوي....

اجيب عربيه بقى من العربيات اللي تحس انهم بيطيروا مش بيمشوا ...تكييف..كاسيت بسي دي و

اشغل منير و اعليه على اخره و اخترق شوارع العاصمه بسرعه جنونيه... و يقفوني بتوع المرور

و يخدوا رخصتي...


ياااه...و الله هتبقى درمغه اخد البت شيماء و لميا و ننطلق على اسكندريه و نرجع في نفس اليوم

و لما نزهق من اسكندريه نبقى نروح شرم

و ابقى اوصل امي الشغل و اخد منها حق التوصيله..هيهيهه هوهوهو

و اعلق مزز بقى....ااه ولاد يكونوا امامير و طوال....اهم حاجه طوال.. ونتفسح سوا بقى و نخرج

بلاش مخكوا يروح لبعيد..

و ممكن كمان لو ضاق بيا الزمن ابقى اقلبها تاكسي..هتبقى مفيده في كل الاحوال و الله

و بعد لما اجيب العربيه بقى...اشتري لاب توب...يا سلام سا سلام


لاب توب..يعني يا معلم تشيت و انت نايم في السرير

لاب توب يعني رفاهيه ليس بعدها رفاهيه تكنولوجيه اخرى

و بدل ما ابقى شايله فايل فيه ورق ابقى شايله لاب توب عليه كل الشغل

و اللي عايز موضوع اقوم مطلعه اللاب توب من شنطته و برنت

و هاجيب كمان اغلى كاميرا ديجتال في العالم..م انا بحب التصوير للي ميعرفش يعني

و اعمل فيلم من انتاجي..و اخلي كساب يكتب السيناريو...لو مكنش عنده مانع يعني

و اجيب فيلا في شرم...و اجيب جميع انواع القهوه اللي في العالم

و اعمل جايزه ادبيه قدرها مليون جنيه و اديها لأحمد خالد توفيق


و افتح جورنال و اخلي استاذ ايهاب الزلاقي هو رئيس التحرير

و ابقى اعمل صفحه لوحدي في الجورنال بقى و البت لميا تعمل صفحه و تسميها انوثه

متفجره ..هههاهاها

و نعمل نسخه انجليزي من الجورنال تمسكها شيماء

و اسافر ايطاليا اناو البت شيماء و لميا..بيقولوا الولاد في ايطاليا امامير اوي


و افتح لأخويا شركة دعايا و اعلان كبيييييييييييره و اجيبلوا احسن مصممين الجرافيك اللي في

العالم

و و اروح اخد تان في اوربا

و اقابل نجوم هوليود اللي بحبهم برده ..جنفير اينستون و فال كلمر واسلم عليه و ابوسه

و اجيب شقه ليا بقى و اعمل الديكورشن بتاعها فاجر..هيبقى ديكورشن عبيط طحن

و شاشه تليفزيون كبيييييييييييره في نص الشقه عشان ابقى اطفى النور كله و اقعد اتفرج على

مسلسل فريندز و كاني في سينما

و اكل كل يوم بيتزا من تيبستي و هامورجر من مؤمن

اعتقد ان العشره مليون مش هيكفوا...خليهم 60 زي ما كانوا

7 comments:

shimaa said...

yasalam ya amira ..yasalam f3ln de el7ya kant htb2a mo5tlfa 2wii bs m5dtnesh m3ky a3ml tan leh:( ma enty 3rfa eny 3yza a3ml ...w nfsy 2wii wallahy rbna ye3lm 2safr italy w mosh 3shan el7tat eli hnak bs elmodo3 3'er kda 5als;)

Anonymous said...

اجمل حاجة فى أحلامك مش الطمع، ايه يعنى ستين مليون دول فكة، ما هو أحمد عز عنده أربعين مليار وبرضه مش قادر يبقى سعيد
عارفة أجمل حاجة فى حلمك غير المتواضع ده ايه؟ انك بتحلمى للآخرين معاك، يعنى مامتك واصحابك اللى هتروقيهم اشى شرم واشى سيناريوهات واشى جرايد.. أحمدك يارب

Anonymous said...

خليكي في أحلام اليقظة ديه لحد مايجيلك لطف ....أصل أنا عندي شعرة ساعة تروح وساعة تيجي

Anonymous said...

يا سلام الاحلام
احلمي
بس ستين مليون يعمله اية بس
أحلمى مثلا بمليار
حتى احلامك فقيرة
تهامى

كلمه said...

ye5reb beeetek ya mas5araa enty .... shofty bteb2y 7elwa ezay lma tebtly ka2abah ....
w 2eh bas el7lm eldala3 da ya m3lm ... 2eshy 3rabyat w mozza talayna ... w sharm w alex w moneer ... lma t3mly kol el7agat de plz plz plzzzzzzzz .. eb2o 5odony m3aaako :D

LAMIA MAHMOUD said...

انا بقول عشان تعملي الكلام ده محتاجة اكتر من 60 مليون .. وبعدين هتعملي جرنان عشان انتي تمسكي صفحة وانا امسك صفحة
طب قولي انتي مدير التحرير وانا مساعد مدير التحرير

Amira Hassan said...

لا يا لميا انا اللي هقوم بجميع ادوار مساعدين التحرير..هاهاهاييي