Sunday, August 06, 2006

وصلة كآبه

زمان و انا صغيره..مع اني والله ما فاكره اخر مره كنت فيها صغيره امتا

يبقى زمان و خلاص بابا كان دايماً كان يقولي "عارفه يا اميره انتي لما يجيلك عريس انا هحط رجل

رجل و اتأمر عليه و اقوله انا عايز مهر مليون جنيه و عايز و عايز و عايز عشان انتي غاليه

اوي..و عشان اطفشه و محدش ياخدك مني"

عيب بابا بقى انه كان طيب اوي..طيب زياده عن المطلوب

بس كان حنين اوي برضه...حنين زياده عن المطلوب

كان متخيل اني احسن بنت في الدنيا و كان عنده يقين اني هاكون حاجه

ايه هي الحاجه دي بقى الله اعلم بس هو كان واثق يعني

كان بيحبني جدا و انا كنت بحبه اوي

و كان بيفرح بس لو ضحكت..

بس المشكله ان كل حاجه كويسه حصلت لي هو مكنش معايا فيها

لما فسخت خطوبتي_ودي حاجه كويسه جدا_ هو مكنش معايا

لما جيت اشتغل و شفت اسمي على اول موضوع ليا في الجرنال هو مكنش معايا

لما بدأت اكتب شعر بجد...مكنش معايا برضه عشان يقولي راي

لما نجحت و اتخرجت مكنش معايا

و لو لا قدر الله ربنا كتب عليا اني اتجوز...هو مش هيكون معايا

ياريتك كنت فضلت يا بابا و فضلت انا زي ما انا..زي ما كنت بتقول عليا

"هبلي هو اللي موديني في داهيه"

لكن للأسف حتى لما عقلت يا بابا...انت برضه مكنتش معايا

4 comments:

shimaa said...

لله يخنقك يا اميرة اكتر ما انا مخنوقة

كلمه said...

still zy manty ..... w kol marah betsabeteny wlahy ..... ma3 enha ka2eeba 7abeteen bas ma3rafsh ana mabsoot leh ??:D

Anonymous said...

اميرة .. فك بقي من كابة
الدنيا لسة حلوة

الحياة لسة فيها حاجات كتير جميلة

تهامي

LAMIA MAHMOUD said...

مش عارفة اقولك حاجة غير حرااااااااااااااااااام عليكي .. يعني اتخنق لنفسي ولا اتخنقلك