Monday, April 23, 2007

افتح زرار قميصي

حد سمع قبل كده عن "متعة ان تكون مكتئباً" ..ممكن متكنش سمعت عنها..او اكيد يعني لأني لسه مألفاه حالاً.نيهاهاهاها..بس دي حقيقة و الله يا جماعة...احياناً الواحد بيحس انه نفسه يكون مكتئب فعلاً..نفسه يبقى مع نقسه كده..ماشي في الشارع حاطط السماعات في ودنه و بيسمع منير "سارح في غربة بس مش مغترب"...العربيات بتتحرك قدامه و بتزمر بس هو مش سامع حاجة..هو مكتئب..روحه مش مع الناس في الارض..روحه "مشرأبه"..اي متمردة على هذا الواقع قليل القيمة بالنسبة له..في واحد ماسك واحد و بيضربه و بيشتمه..بس هو شايفهم و هما بيتحركوا بس ..بالنسبه لهم ادائهم عبثي..يبص لهم بلامبالاة..و يعدي الشارع.و السماعات لسه في ودنه...و الاكتئاب مخلي الشجن خارج مع كل نفس بيتنفسه ولو قربت منه ممكن تشم ريحته...يروح يقعد مع اصحابه على القهوة..وهو حاطط السماعة في ودنه بردو..اصحابه عمالين يتكلموا و يشدوا السماعة من ودنه...يحطها تاني و يبص لهم بلامبالاة..منير لسه بيغني...هيسمعهم هما ليه.." فينك..انا من غيرك...انا مش عاقل و لا مجنون"...هو مش عايز يعيط...هو مش حزين..ولا عايز يضحك..هو مش سعيد...هو حالياً مكتئب ..وهو مستمتع...ليه الناس متطفله كده..و كل شوية ..مالك؟..مالك؟...هو عايز حالياً يختزن كل حاجة بتحصل ادامه..مش عايز يبذل مجهود حتى في الكلام..عايز يتفرج على اللي بيتخانقوا ..على اللي بيحبوا في بعض..على الام اللي بتضرب ابنها ...و على سواقين التاكسي اللي بيتخانقوا على اي حاجة عبيطة عشان يفرعوا غلهم في بعض...على الولاد اللي عمالين ينفرجوا على البنات اللي لابسه ضيق..و على الولاد اللي قرروا ان البص وحده مش كفاية..على البنات اللي بيتوشوشوا على ولد امور ماشي ادامهم..يكشر من منظر معجبوش..يبتسم بمرارة لمنظر تاني ...عايز يتفرج بس...اصل هو مكتئب..روحه حالياً مرهفة جداً..عندها استعداد انها تتفهم مشكلة اي حد...هو حاسس دلوقتي بكل حد معدي ادامه..روحه رادار عالي التردد..لاقط نفسية كل اللي حواليه..و فاهم عقدهم كويس جداً..بس بردو مش عايز حد يقرب منه...عشان هو مكتئب..ومستمتع بالاكتئاب جداً..مستمتع بروحه و هي محلقة..يسيب اصحابة و يروح بيتهم وهو في طريق بيتهم حاطط السماعات برده..مش عايز يسمع صوت زمامير..ولا صوت بني ادمين..في واحدة بتغني في التلفزيون اللي عدا من عليه و ماله ترقص و هي لابسه من غير هدوم..يدور وشه و يركز مع منير .."افتح زرار قميصي"...يوصل بيته..ابوه و امه بيتخانقوا...هو شايفهم بس بيشوحوا بس مش سامع هو هما بيقولوا ايه...وهو "Don`t Care" اساساً..يدخل اوضته ..و يقفل عليه و يقلع هدومه و يقف بالفلنه وهو بيشرب سيجارة و بيبص لعمود النور اللي ملموم عليه الهاموش..و هو اساسا بيتعبر دي اقوى لحظات الاكتئاب بتاعته...يدخل اوضته ..]قعد على سريره..يستعيد كل اللي خزنه طول اليوم من مشاهد في الشارع...عينه تدمع في شجن..يخرج الورقة و القلم اللي في جيب بنطلونه الوراني..و يكتب "إنفجروا او موتوا"...يلزق الورقة على
الحطية...وهو لسه بيسمع منير...."يا عذاب النفس..واخدني لفين"
**************
نقلاً عن الدستور الاسبوع اللي فات

21 comments:

Ahmed taher said...

تحياتي وسعيد باني من اوائل المشاركين
اتفق واختلف معكي قليلا
اتفق في احتياجنا لبعض الوقت نستشعر فيه السكينة والهدوء النفسي متأملين جوانب حياتنا وما جد بها من سلب او ايجاب ..
واختلف في كون الاكتئاب قد يكون مطلبا او غاية نسعى اليها ....

ونهاية احييكي على موضوعك متمنيا مشاركتك عندي..

مصـ( الخير )ـعب said...

اسمحيلي أخلع لك القبعة.. بس خلينا نعيد تسميته
هو مش اكتئاب
هو ممكن يكون خواء.. تحليق في اللاشئ
ممكن يكون توحد مع النفس
ممكن يكون أي حاجة تانية

بس الاكتئاب شئ آخر

Shower-Mirror said...

المعلمه اميره :

يعنى انتى قلتيلنا انك قابلتى الدكتور احمد خالد
و غيظتينا بالصور

و كمان ثلاث مرات

و ماهانش عليكى تحكيلنا ايه اللى حصل بالتفصيل

يا ساتر ..ده انتى بخيله بجد

عموما انا هاحكم عليكى انك تروحى البلوج بتاعى ...فيه قصه من اربع اجزاء لازم تقريها ...عشان رأيك يهمنى و لازم تكتبى تعليق طويل و مفصل
هههههههه

و عشان اتأكد انك هاتيجى و مش هاتطنشى ...هاحلفك بالغالى

عارفه الغالى و الا اقولك هو مين ؟ ذ

;)

تحياتى يا معلمه

هو كله معلمين كده ...مافيش صبيان هنا و الا ايه

REEMOO said...

اعتقد انى مختلفه معاك فى تشخيصك للحاله يا اميره
اللى وصفتيه دى مش حاله اكتئاب
دى لحظه مع النفس
الاكتئاب غير كده خالص
ليه طقوس تانيه اسالينى انا عليها
اهمها انك فى حاله الاكتئاب بتبتعد تماما عن الناس
وبتفضل الانعزال
بس ده ميمنعش انى بتفق معاكى فى جزء
ان فى ناس بتجد متعه فى الحزن
الدموع والاكتئاب والالم بيسبب ليها نوع من الاستمتاع الغريب
اللى بتحب تحسه من فتره للتانيه
كالعاده رائعه يا اميره
تحياتى ليكى

كراكيب عادل said...

انا بيحصل معاي كدة كتير بس مش بكون مكتئب مع اختلاف الحالة مرة كنت ماشي بالعربية راجع البيت من مكان لقيت نفسي عند الشغل ازي وصلت لهنا وقطعت اشارات مرور وتفاديت سيارت وعملت اشارت يمين وشمال والاذاعة كانت شغالة بس مش سامع ولا حاجة هي شرود او حالة غريبة ملهاش وصف
تفريغ للعقل الباطن يمكن
معرفش

shabfa2re said...

احياناً بيبقى الحزن عادة اكتر منه احساس

"*~Daisy~*" said...

kan gamed awi el article da ya bent...
=) mota2alleq

بنى أدم مع وقف التنفيذ said...

الموضوع انا قرأت في الجريدة .. وبصراحة كان هايل برافو عليكي بجد
انا كنت ناوى أكتب عنده فى مدونتى عشان كل الناس تشوفه

عامل زي الموضوع بتاع السنة اللى فاتت
اللى كان عجبنى برضة

بس انتى بتجيبه الاكتئاب ده كل منين

shaimaa said...

إنفجروا او موتوا"...يلزق الورقة على
الحطية...وهو لسه بيسمع منير...."يا عذاب النفس..واخدني لفين"

gmeeeeeeeeeel 2wiii ya mero..w 7lw 2wii el2sm bt3 el post kman
i think eny 2reto w ana fe 7ala shbehya le wsfk bs m3 27'tlaf eny mkontsh mostmt3a beha ..well done amira:(

طهقان said...

اول مرة ازورك
الاقي زرار القميص مفتوح
طب
دا كلاااام

MoHaMeD HoSSaM said...

بصراحة انا مش عارف اقول غير انك وصفتى الى كان نفسى اقوله بس مكونتش عارف اقوله ازاى

بوست جامد اوى اوى اوى


صحيح هو انتى كنتى ولد قبل كدة؟
:):):)

e7na said...

الحاله معلقه معاك لدرجة انك تكتبى عنها فى المدونه فى الدستور؟؟؟؟؟؟؟؟؟؟
يارب تكون مجرد خواطر

Anonymous said...

السلام عليكم و رحمة الله و بركاته
ازيك يا مرمرة - الاسم ده غالي اوييي عليا علي بالمناسبة- المهم .. كنت ف منتصف الطريق اللي هو التدوينه و فضلت اسأل نفسي اقولها اني قريتها ف الدستور و لا لأ ؟؟؟
و الحمد لله لقيتك كاتباها و مش مستنيه حد يتكلم
ما علينا
طبعا المقال كان له اسم تاني و كان جمييييل لفت نظر واحدة صاحبتي فسألتني "يعني انا لو لاقطة نفسية كل اللي حواليا ابقى مكتئبة ..بس انا و الله مش مكتئبة" ..قلتلها جمله كده بتاعت واحد قريت اسمه كتييييييييييير و لسه مش فاكراه
الراجل بيقول
الحياة ملهاة لمن يفكر و مأساه لمن يشعر.. بس هي بقى بتفكر اكتر ما بتشعر عشان كده عادي

بس اللي واثقة منه ان الراجل مرضيش يكتب عن اللي بيفكر و يشعرف نفس الوقت .. عشان الرقابه .. هو لو كان اتكلم كان قال انها بتجيب بزرميط صراحة
احممم .. اسفة على اللفظ .. و على الرغي
ياللاّ كفايه كده
سلام

the wall

خواطر شاب غاضب said...

طيب واللي عنده اكتئاب نفسي يعمل ايه بق ي
حتي العلاج مش نافع
معايا
وبقي بيني وبين الانتحار خطوو
ياريت تشرفيني بزيارة مدونتي قبل لما انتحر

david santos said...

O dia 25 de Abril de 1974 foi o dia do derrube da ditadura fascista em Portugal, a chamada REVOLUÇÃO DOS CRAVOS, e a queda do (poder) dos inimigos do povo. 25 de Abril, sempre.

Day 25 of April of 1974 was the day of it knocks down of the dictatorship fascist in Portugal, the call REVOLUTION OF the flowers, and the fall of the power of the enemies of the people. 25 of April, forever!
يوم 25 نيسان 1974 كان يوم تقرع عليها من الديكتاتوريه الفاشيه في البرتغال والدعوة للثورة الزهور ، وسقوط سلطة أعداء الشعب. 25 نيسان ، الى الابد!


День 25 апреля 1974 года, в день он постучит в воздухе фашистской диктатуры в Португалии слово О РЕВОЛЮЦИИ цветы, и падение власти враги народа. 25 апреля, навсегда!
Le jour 25 d'avril de 1974 était le jour de lui frappe vers le bas du fasciste de dictature au Portugal, de la RÉVOLUTION d'appel des fleurs, et de la chute de la puissance des ennemis du peuple. 25 d'avril, pour toujours !
Tag 25 von April von 1974 war der Tag von ihm klopft unten vom Diktaturfaschisten in Portugal, von der Anruf REVOLUTION der Blumen und vom Fall der Energie der Feinde von den Leuten. 25 von April, für immer
25天41974年的一天,它拍下來的法西斯獨裁政權,葡萄牙 號召革命的鮮花,秋天的權力得到人民的敵人. 25日,永不停息

Mony The Angel said...

I read it the last week :)
it's so perfect
gamed awee
haila ya mero

Anonymous said...

بوست جميل وانا قلتلك راى فيه لما قريته فى الدستور بجد وصفك رائع ياميرو يااجمل طفله هههه انا شايفاكى كده انا يمكن مقصره فى التعليق عندك بس انت ياجميل مش محتاج التعليق ... سلمى

لو كنت أعلم said...

هاااي أميرة
حسبي الله ونعم الوكيل
إنت قدرتي ببساطة شديدة تعبري عن كل اللي جوايا
يحرق الاكتئاب وسنينه
أنا بقالي شهر في الحالة سالفة الذكر
ييييييييياااااااعيييين
ده تأثير حالة الاكتئاب عليا
ياريت تزوريني على مدونتي عشان تشوفي الاكتئاب وصل لحد فييين
اتمنى إننا نتواصل

بس بجد

جاااااااامدةةة موووت
تحياتي

الوردة السوداء said...

يعنى مش عارفة اقولك ايه على الحالة اللى انتى بتكتبى عنها

لكنها فعلا بتحصل
بس مبتبقاش بالسلبية دى
انتى كدة بتتكلمى عن جثة
مش بنى ادم من لحم ودم

anawafkary said...

gamil gedan ya amira

bas momkn n7ot fel post dah bdl kol klmt ikt2ab klmt s3ada, we badl el sma3at fe wdno n7ot sot tal3 mn 2lbo

mesh kan hyb2a rd f3lo howa howa, hytfrg we yskot we ysm3 sot 2albo

mesh 3arf

tamer afify said...

أول مرة أشوف اكتئاب بالجمال ده
مع انه عندك بيقرب من حالة لا وعي وشرود مش اكتئاب بالمعنى المعروف

حالة رائعة
تحياتي