Thursday, March 22, 2007

حكم الخسيس

من يوم ما عملت المدونة بتاعتي و انا واخدة عهد على نفسي اني مش هكتب فيها اي حاجة ليها علاقة بالسياسة
و هخليها شخصية بس
مش عارفة النهارده بس
وده متأخر انا عارفة
حسيت ان الموضوع فعلا مش سياسة
الموضوع شخصي جداً
مش قادرة اقول غير للأسف انا حزينة
حزينة جداً
و انا صغيرة كنت بحلم اني اعمل حاجات كتير اوي لما اكبر
كانت احلامي اكبر مني بس للأسف مححقتش ربعها تقريباً
كل شوية اتصدم بواقع مقرف اسمه نظام دولة
نظام خلانا كلنا سواء بطريق مباشر او غير مباشر اشباه بشر
و الله يا جماعة الموضوع مش سياسة
انت ياللي بتقرا و حسران على اختك اللي عرفت انها ماشية في البطال
صدقني مش ذنبها ذنب اللي ماسكين البلد
و انتي ياللي بتقري و حزينة على اخوكي اللي بقى عنده 30 سنة و معملش حاجة في حياته و بتلومي عليه انه مقضيها مخدرات
و الله مهو ذنبه
و كل الشباب اللي بيتغرب جوا البلد من بين كل محافظة حبه يدور على شغل احسن
اهله لازم يعرفوا انه مش ذنبهم
بجد دي حسرة في قلبنا كلنا
انا من صغري مش بحب اتكلم في السياسة
و اقول مليش فيها
بس اموت و اعرف رجلي جت ازاي في حركات مراقبة على الانتخابات
و ازاي يوم وقفت في مظاهرة رغم اني مش بقتنع
بس كل اللي حسيته بعد ما قربت من قلب الحدث زي ما بيقولوا
ان الموضوع من سياسة
الموضوع انسانية
احنا مبقناش بني ادمين و هما اللي سرقوا انسيتنا منا
بقينا بنشتم بعض في كل حته
و في المواصلات الاقي الناس بتزغد بعض كأنهم اعداء
و الرجاله يحسسوا على اي بنت ادامهم من غير تفكير
و احساس بالمهانة و الذل و الدونية بقى جوانا كلنا
و كل ده بسبب اننا مش بناخد ابسط حقوقنا
اننا نكون بني ادمين

بمناسبة التعديلات الدستورية يا جماعة
هنقولكم كلمات الاغنية دي
اقروها و اسموعها

يا ما مواوويل الهوا ياما موواليلي
طعن الخناجر و لا حكم الخسيس فيا
سألت شيخ الطريقة
مرضيش يجاوب سؤالي
و دارى عني الحقيقة
وفتني حاير في حالي
سألت شيخ الاطبه
دوا الجراح اللي بيا
نظر لي نظرة محبة
و قالي دوايا في ايديا
يا ما مواوويل الهوا ياما موواليلي

طعن الخناجر و لا حكم الخسيس فيا
يا مصر و انتي الحبيبة و انتي اغترابي و شقايا
ده انتي الجراح الرهيبة و انتي اللي عندك دوايا
علمني حبك عبارة
سهلة و بسيطة و عفية
شرط المحبة الجسارة
شرع القلوب الوفيا
*********
نزلوا الاغنية من هنا
و اقروا البوست ده عن التعديلات الدستورية

10 comments:

shimaa said...

ma hoa 2sl elmodo3 ya mero mb2ash sysa mlnash feha da a7na b2ena bntsbt 3lne ye3ni w 3eni 3enk kda ..w ela t3delat eldostor gali el2wl enzhal w b3den hastret d7k
2slha ms7'ra ye3ni ..yala rbna mwgod ...

طعن الخناجر و لا حكم الخسيس فيا

smraa alnil said...

يا اميرة وحتي لو قرينا واعترضنا مش في فايدة يا امي

We2am said...

ya nhaar abyaad..tesd2y eno sa7!!msh mowdo3 syasa..modo3 ensanya!
3bqryya elqote deh ya mero..tetdars ya3ni :)

AbdElRaHmaN Ayyash said...

كنت عاوز اكتب كتير
بس خلاص
شكلها كده . مفيش فايدة

خيرالدين said...

أنت عارفه يا أستاذه أميره الهم الأكبر واللى بيزود حزن الواحد ان اللى بيسرقوا ويعذبوا ويخربوا البلد واقفين ايد واحده ومتجمعين فى الشر واحنا اللى المفروض نبقى ايد واحده فى الخير سايبينهم وبنقطع فى بعض ونكفر بعض
أحيانا أقعد افكر وايه الحل
حتى الهروب مش حل

حدوته مصرية said...

غصب عننا بيقحمونا فى السياسة لان ده حال البلد واحنا عايشينه و بنعانى منه
ربنا معانا

No Fear said...

السلام عليكم
و الله الواحد قرف بس بجد يعني مش فزلكة
إن الله لا يغير ما بقوما حتي يغيروا ما بأنفسهم
مش بقول أنك غلط في كلامك بس كلنا لو أتحكمنا في حد بنستعبده مش عارف ليه
يعني نشتكي من اللي فوقنا و نرجع نعمل في اللي تحتنا زي اللي فوقنا ما بيعمل فينا و أكتر كمان
المشكلة إن مفيش ملامح نور من بعييييييييييييييييييييييييييييييييد
ربنا يستر
سلام

No Fear said...

السلام عليكم
بعد أما قريت التعليقات لاقيت كل الناس زي بالظبط بتقول مفيش فايدة
الحمد لله طلعت صح

Mony The Angel said...

u r totally right
what we can comment!!

أحمد فؤاد الدين said...

لا فيه فايده و حل راجع فيلم
V for vendetta
و فيلم بابل لمعرفه ما يحدث
و الكيف للضحك علي حالنا
تدوينه عظيمه يا حبيبتي تسلم ايدك