انا بحب الفلسفه و بعشق شيللر ...و بختلف مع سارتر....و بيحيرني نيتشه و يخلني اسأل نفسي ايه اللي وصله للفلسفه القاسيه العنيفه دي.. قلت الكلام ده قصاد صاحبتي اللي فالسن و شفت على وشها اعتى معاني الارف و الاشمئزاز..فسألتها في ايه؟ فكان ردها مقنع و صريح وواضح.....انا بكره الفلسفه والفلاسفه..مش بطيقهم....
هنا انا افتكرت ان المسكينه اول تعارف بينها و بين الفلاسفه كان عن طريق الجامعه وما ادراك ما الجامعه... احنا بلا فخر اي مدرسه فمصر و اي جامعه كفيله انها تكرهك فاي حاجه...حتى لو كنت انت اصلا بتحبها و داخل عايز تدرسها... مابالك بحد بيعرف حاجه لاول مره...
انا مدرستش -ولله الحمد-فلسفه لا فثانويه ولا كليه و كل معلوماتي عنها من كتب غير كتب المدرسه فعرفتها صح و فهمتها صح...
و التعتيم الثقافي اللي فالجامعات و المدارس بالذات مش فالفلسفه بس ..ده فاي ماده و اي مجال ..لان المشكله الحقيقيه مش فاللي بيتقدم فالمناهج.. المشكله فطريقه تنفيذ الكتب العقيمه و اسلوب التدريس اللي لا يقل عقما عن الكتب.. ومدام احنا بدانا بالكلام عن الفلسفه فانا اراهنك انك تجبلي حد درس فلسفه فثانوي او مدرس فلسلفه حتى يقدر يناقشني فحياه شيللر و نشاته و معتقدات نيتشه و كتابته و اثرها في المانيا...دا لو عرف مين نيتشه حضرتك اساسا
قيس بقى على كده كل حاجه...رسم ... موسيقى ... دين .. عربي ... لغات ... كله
في حد عايز يعلم بني ادم الرسم يقوله ارسم كذا.. ارسموا رصيف و شجره ...و دايما الشجره اللي بترسمها مدرسة الرسم طالعه عن الارض.متسالنيش ازاي ..الشجره الطائره اصلها ..يا بشر في حاجه اسمها حريه وخيال..قولوا ارسم وبس..لا.. ازاي ميصحش..دا غير رسومات المواسم.. بعد العيد خروف... و فعيد العمال حاجه مدوره كده و مخططه والله م اعرف هي ايه و جنبها علم مصر _كنت دايما ببدل الاحمر مكان الاسود- و مفتاع انجليزي.. و فاكتوبر دبابه ورمل وجندي مصري ماسك بندقيه و ادامه جثه جندي اسرائيلي بيجيب دم _بلون الاحمر_ قال يعني هما عندهم دم اساسا...
ومواضيع التعبير نفس السيناريو..اكتب موضوع تعبير عن حرب اكتوبر و فالثانوي عن التكنولوجياو الانترنت و الموضوع ده طبعا احنا كنا حفظينه من الملزمه بتاعت الدرس الخصوصي ..يعني موضوع التعبير متوقع هيجي ايه و بنحفظه... والله دي وكسه...
اللي خنقني فعلا فثانوي اني كنت بدخل مسابقات قصص قصيره وكده..كانت المسابقه تيجي من الوزاره ورقه مطبوعه مكتوب فيها اكتب قصه قصيره تكون نهايتها احد الجمل الاتيه..وبعديها يكتبلك عشر جمل..على غرار...(وقرر انه لن يتخلى عن الامل و يبدأ من جديد)
يانهار اسود..حتى الحاجه اللي ملهاش علاقه بالمناهج بيحددوها..اللي هي المفروض مسابقات الابداع..سبحان ما ابدع اللي ماسكين التعليم فالبلد دي والله
و اوضه الموسيقى, مقتصره على بنتين او ولدين بيهبلوا على بيانو الافيد انه يتعمل حصاله او زباله يحط فيها الطلبه الزباله اللي بيلموها من الحوش فحصه الالعاب
حتى الدين ...تحس انه ماده ناشفه مفيهاش روح كل همهم انك تيجي حافط سور القرآن مش المهم تحبها او تحس بيها و تُأثر فيك ..انا فاكره اني اول مره احس بايه قران و تهزني كان فاولى كليه لما سمعت شريط لعمرو خالد كان بيتكلم عن حب ربنا لينا و فسر سوره الضحى كنت حفظتها انا فالمدرسه بس عمري ماحسيت بيها كده ابدا..بزمتكوا عمر مدرسه او مدرس دين قعد فحصه يقولك اد ايه ربنا بيحبك..
ولا اللغات..ده حوار تاني..عرض معوق لاي لغه فكتب الوزاره كفيل انه يخليك تقتل اي اجنبي شفته صدفه فالحسين..
الماني بقى فرنساوي انجليزي انت و نصيبك.. انت هتنجح اه وممكن تجيب درجات كويسه..بس استفدت ايه بزمتك..فاكر ولا كلمه من اللغه التانيه اللي اخدتها..ممكن تكون فاكر كلمتين..لكن بقى احساس تاني لو رحت اخدت كورس فالمعهد البريطاني او الجامعه الامريكيه او اي معهد يكون اللي بيدرسلك فيه...م الاخر مش مصرين او مصرين متعلمين بره...و في طبعا معاهد هنا للايطالي و الالماني و لكل لغه ..
دا غير ان اللي بيدخل كليه السن لو كان قبل كده فمدارس عاديه مش لغات هيتقعد و يحس باليأس لما يلاقي الدكاتره متمكنه جدا من اللغه اللي هو ميعرفش عنها حاجه و الطلبه بتوع مدارس اللغات مندمجين معاهم و يكتشف انه لازم ياخد كورسات لغه عشان يتماشى معاهم و طبعا عمر الدكاتره ما هتحاول انها تنزل لمستوى الطالب ده و تفهمه واللي معوش ياخد كورسات ربنا يسهلوا بقى فمحطه بنزين ولا مقله لب محترمه بعد اما يتخرج... يعني الموضوع مش بس انهم بيكرهوك فالحاجه ...لا ..الاجمل انهم بيخلوك على راي امي..تيتي تيتي زي ما روحتي زي ما جيتي......عشان كده الافضل لينا انا احنا نعلم نفسنا بعيد عن الجامعات و المدارس لان متعه اي ماده بتنط من على سور المدرسه زيها زي الطلبه المكبوتين اللي طالع عينهم.
لازم ننسى اي حاجه بنقراها ونذاكرها بمجرد ما تأدي مهمتها فالامتحان..و المتعه الحقيقه هتكون فحريتك و انطلاقك وانت بتقرا اللي انت عايزه بالاسلوب اللي انت حابه..محدش يفرض عليك حاجه..محدش يقولك متناقش..ولا حد يقولك صم..انت هنا الاستاذ ..وولي الامر و الناظر فامور ثقافتك...ابتدي بقى..و اتعلم بجد
Subscribe to:
Post Comments (Atom)
No comments:
Post a Comment