الحاجة الجديدة جميلة بغض النظر..و النور لما قطع امبارح بليل اداني لوقت اللي اكتشفت فيه ان حياتي مفهاش أي حاجة جديدة ، فلو هنرقص..يبقى لازم نتجنن...وش !
ممكن كمان نقطع هدوم بعض،نتغابى على بعض،..نفرغ طاقة..نشحن طاقة ..طاقة تانية جديدة غير الطاقة المكمكمة اللي جوايا، و مش هزعل ، لو جبت سكينة و شقيت بيها صدري..عشان يتهوى..الملل معبق جوا..وقرفت.
بالرغم ان صوتي مش حلو بحب اغني جداً، و بحب ارقص و انا مفهمش أي حاجة فيه،هموت على عربية و انا مبفرقش بينهم ، و بحب الحياة جداً..بس مش عارفة اعيشها ازاي.. انا احسن واحدة تاخد قرارت صح..و متنفذهاش و مع ذلك انا بعتبر نفسي اكتر لوحة سريالية مفهومة في الكون كله.
...........
المصيبة انك تكون فاكر انك فهمتني، مصيبة عشان مستحيل تكون بتفهم ، و مصيبة بردو لو كنت فعلاً فهمتني في حين اني انا نفسي لسه مفهمتنيش..هي مصيبة اصلا في كل الاحوال اني عرفتك فمش هتفرق كتير..انا لله و انا اليه راجعون.
......
حالات الانغلاق ممكن تيجي في لحظة،مسافة دورين بالاسانسير،مش انغلاق بالظبط لأني بحب الناس، هي حاجة شبه انك تكون حابس نفسك جوا صندوق عازل للصوت و عازل للطاقة السلبية،بس صندوق إزاز،عشان افضل شايفة الناس و اعرف اتواصل معاهم حتى لو بالاشارة ، ووقت اللزوم هيجي حد ما يكسر الصندوق و يفاجئني.
........
الدوخة في حد ذاتها ممتعة ،و انا مش هبطل اعترف اني بحب الدوخة بكل انواعها ،دوخة النفس الطويل من الشيشة ، و دوخة نفس الحشيش لواحد مبيشربوش، دوخة الاحساس بالتوهان لما تكتشف انك فعلا مش عارف انت عايز ايه،و مش بضايق من دوخة ما قبل الاغماء، و بسيب لها نفسي، و بغرق فيها و بتخيل ان جسمي طاير.
و محبتش في حياتي أد دوخة اللحظة اللي بعرف فيها اني خلاص هسيب اللي بحبه،و انا شايفة كل حاجة بتتهد ادامي..دوخة و لذة انك لسه هتبتدي من جديد...و هتعمل كل حاجة تاني من الاول..على نضافة.
